1447ވަނަ އަހަރުގެ ޤައުމީ ދުވަސް ފާހަގަކުރުމުގެ ގޮތުން ދިދަ ނެގުމުގެ ރަސްމިއްޔާތެއް މި އަދު ހެނދުނު 6:00ގައި ށ.އަތޮޅުކައުންސިލް އިދާރާގެ ގޯތިތެރޭގައި ބާއްވައިފިއެވެ.

ދިވެހިންގެ ހިތްތަކުގައި ޤައުމީ ރޫޙް އާލާކުރުމުގެ މަޤްޞަދުގައި ފުނަދޫގެ މުއައްސަސާތަކާ ގުޅިގެން ބޭއްވުނު މިރަސްމިއްޔާތު ކީރިތި ޤުރުއާނުގެ މޫރިތި އާޔަތްތަކުން ފައްޓަވައިދެއްވީ ފުނަދޫ ސްކޫލުގެ ގްރޭޑް 10ގެ ދަރިވަރު އިބްރާހީމް ޙުސައިން ޢަބްދުﷲ އެވެ. ދިދަ ނަންގަވައިދެއްވީ ށ.އަތޮޅުކައުންސިލުގެ ރައީސް އަލްފާޟިލް މުޙައްމަދު ޝިޔާމެވެ. ދުވަހާ ގުޅޭގޮތުން ވާހަކަދެއްކެވީ ފުނަދޫ ސްކޫލުގެ ގްރޭޑް 10ގެ ދަރިވަރު ފާޠިމަތު ޝައިން އަޙްމަދެވެ. ދަރިވަރުގެ ވާހަކައިގައި  ޤައުމީ ދުވަހަށް ނިޞްބަތްވާ ބޮޑުތަކުރުފާނު ދިވެހި ޤައުމަށްޓަކައި ރޭވުންތެރިކަމާއެކު ކުރެއްވި ޖިހާދުގެ މައްޗަށް އަލިއަޅުވާލައްވައި ދިވެހި ޤައުމަށްޓަކައި މުޙައްމަދު ތަކުރުފާނާއި، ޙަސަންތަކުރުފާނާއި، ދޮންބަންޑާރައިންނާއި، ޙުސައިން އާދަމް ކުރެއްވި ޖިހާދުން ނަމޫނާ ނެންގެވުމަށް ގޮވާލެއްވިއެވެ.  މި ރަސްމިއްޔާތުގައި އެންމެހާ ޙާޟިރީން ބައިވެރިވާ ޤައުމީ ސަލާމެއް ކިއުން އޮތެވެ.

ފުނަދޫގެ މުއްސަސާތަކާއި، އަތޮޅުކައުންސިލާ ގުޅިގެން ކުރިޔަށް ގެންދެވުނު މި ރަސްމިއްޔާތުގައި ފުނަދޫ ސްކޫލާއި، އަތޮޅުހޮސްޕިޓަލާއި، ޕޮލިސް ސްޓޭޝަނާއި، އަތޮޅުކައުންސިލުގެ ވެރިންނާއި، މުވައްޒަފުންގެ އިތުރުން ބޭންކް އޮފް މޯލްޑިވްސް އާއި، ފުނަދޫ އެއަރޕޯޓް އޮފީހާއި، މޯލްޑިވްސް އިމިގްރޭޝަން ށ.ފުނަދޫ އޮފީހުގެ މުވައްޒަފުން ބައިވެރިވެލެއްވިއެވެ.