ށ.އަތޮޅު ހޮސްޕިޓަލުން ދެވޭ ޚިދުމަތްތައް ފުޅާކޮށް މުވައްޒަފުންގެ ހުނަރާއި، ޤާބިލިއްޔަތު އިތުރުކުރުމާއެކު ޚިދުމަތުގެ ފެންވަރުމަތިކޮށް ރައްޔިތުންނަށް ލުއިފަސޭހަ ކަމާއެކު ޞިއްޙީ ޚިދުމަތް ލިބޭނެ މަގު ފަހިކުރުމުގެ ގޮތުން ށ.އަތޮޅު ހޮސްޕިޓަލުގެ އައި.ސީ.ޔޫ އާއި އެން.އައި.ސީ.ޔޫގައި މަސައްކަތްކުރާނެ ޤާބިލު މުވައްޒަފުން ބިނާކުރުމަށް ށ.އަތޮޅު ކައުންސިލާއި، އަތޮޅު ހޮސްޕިޓަލާއެކު އެއްބަސްވުމެއްގައި ސޮއިކޮށްފިއެވެ.

މިއަދު މެންދުރުފަހު 13:40 ގައި ށ.އަތޮޅު ކައުންސިލުގެ ޖަލްސާކުރާ މާލަމުގައި ބޭއްވުނު ބައްދަލުވުމުގައި ށ.އަތޮޅުކައުންސިލުގެ ފަރާތުން މި އެއްބަސްވުމުގައި ސޮއިކުރެއްވީ ކައުންސިލުގެ ރައީސް މުޙައްމަދު ޝިޔާމެވެ. އެ ހޮސްޕިޓަލުގެ ފަރާތުން ސޮއިކުރެއްވީ ހޮސްޕިޓަލުގެ މެނޭޖަރ ހެލްތު ސަރވިސް އަޙްމަދު ފާއިޒެވެ.

މި ޕްރޮގްރާމު ހިންގުމުގެ މަޤްޞަދަކީ ށ.އަތޮޅުހޮސްޕިޓަލުން އައި.ސީ.ޔޫ، އެން.އައި.ސީ.ޔޫގެ ޚިދުމަތް ލިބިދިނުމަށް ފުރުޞަތު ފަހިކޮށްދިނުމާއި، ޚިދުމަތުގައި ދެމިތިއްބެވި މުވައްޒަފުންގެ މަސައްކަތުގެ ހުނަރާއި، ޤާބިލުކަން އިތުރުކުރުމާއި، އައު ޓެކްނޮލޮޖީ އާއި، ވަޞީލަތްތައް އިތުރުކޮށް މުވައްޒަފުން ޓެކްނޮލޮޖީއަށް އަހުލުވެރިކުރުމާއި، ޚިދުމަތުގައި ދެމިތިބުމަށް ހިތްވަރުލިބިދިނުމާއި، މަސައްކަތުގެ ޔަޤީންކަން އިތުރުކުރުމާއި، އަމިއްލައަށް އުނގެނުމަށް ހިތްވަރުދީ ދާއިރާއިން ކުރިޔަށްދިއުމުގެ ފުރުޞަތު ފަހިކޮށްދިނުމެވެ.

މިއަދު މި ވެވުނު އެއްބަސްވުމުގެ ދަށުން ށ.އަތޮޅު ހޮސްޕިޓަލުގެ އައި.ސީ.ޔޫ. އާއި، އެން.އައި.ސީ.ޔޫ އަށް މިހާރަށް ބޭނުންވާ މުވައްޒަފުންނަށް މި އަހަރުގެ ޑިސެންބަރު މަހުގެ ނިޔަލަށް ކަމާގުޅޭ ތަމްރީނު ލިބިގެންދާނެ ކަމަށް މަޢުލޫމާތު ލިބިފައިވެއެވެ.

މި ބައްދަލުވުމުގައި އަތޮޅު ރަށްރަށުގެ ޞިއްޙީދާއިރާ ކުރިއެރުވުމަށް މިއަހަރުގެ ބަޖެޓުގައި ހިމެނިގެން ކުރެވެމުންދާ މަސައްކަތްތަކާ ގުޅޭގޮތުންނާއި، އަތޮޅުރައްޔިތުންނަށް ދޭ ޚިދުމަތް ފުޅާކުރުމަށް އަތޮޅު ހޮސްޕިޓަލަށް މިވަގުތަށް ބޭނުންވާ ކަންތައްތަކާ ގުޅޭގޮތުން މަޝްވަރާކުރެއްވިއެވެ.