ށ.އަތޮޅު ކައުންސިލުގެ އަހަރީ ހަފުލާ 21 ޑިސެމްބަރ 2024ވަނަ ދުވަހުގެ ރޭ ބާއްވައިފިއެވެ. އަތޮޅު ކައުންސިލުގެ ރައީސް މުޙައްމަދު ޝިޔާމް ޝަރަފްވެރިކޮށް ދެއްވި މިހަފުލާގައި ހާޟިރީން އެންމެ ރަނގަޅު މުއައްޒަފުނަށް ހަނދާނީ ލިޔުން ދީފައިވެއެވެ. އަދި މީގެ އިތުރުން އަހަރުދުވަހުގެ މުއައްޒަފުންގެ މަސައްކަތަށް ބަލާ ކޮންމެ އަހަރަކު ދެމުންގެންދާ ވިޔަވަތި އެވޯޑަށް ހޮވުނު ފަރާތްތަކަށް އެވޯޑު ދީފައިވެއެވެ.

2024 ވަނަ އަހަރު ހުރިހާ ގޮތަކުން އެންމެ ރަނަގޅު މުވައްޒަފު ބިޒްނަސް ޑިވެލޮޕްމަންޓް އޮފިސަރ އައިޝަތު ޔަމްނާއަށް ލާމަސީލު މުވައްޒަފުގެ އެވޯޑު ލިބިފާއިރު، އެންމެ ޚިދުމަތްތެރި މުވައްޒަފުންގެ ގޮތުގައި ހޮވިފައިވަނީ ކައުންސިލް އޮފިސަރ އަގުލީމާ ޢަބްދުއްޞަމަދު އާއި ކައުންސިލް އޮފިސަރ އާމިނަތު މޫސާ އެވެ. އަދި ފަޅުވެރި އަބްދުﷲ ނަޢީމަށް ހީވާގި މުވައްޒަފުގެ އެވޯޑު ލިބިފައި ވާއިރު ހިތްމަތްތެރި މުވައްޒަފުގެ އެވޯޑު ލިބިފައިވަނީ ކައުންސިލް އޮފިސަރ ސާލިމް ޢަބްދުﷲ އާއި ކައުންސިލް އޮފިސަރ އަޙުމަދު ޢީސާ އަށެވެ.

އަތޮޅު ކައުންސިލުގެ މުވައްޒަފުންނާއި މުވައްޒަފުންގެ އާއިލާތަކުން ބައިވެރިވި މިހަފުލާގައި ކައުންސިލުގެ ރައީސް ދެއްކެވި ވާހަކަ ފުޅުގައި ށ.އަތޮޅުކައުންސިލުން ކޮންމެ އަހަރަކު ހޯދަމުންގެންދާ ކާމިޔާބީތަކުގެ ހަގީގީ ހިއްސާދާރުންނަކީ ކައުންސިލުގެ ހީވާގި މުއައްޒަފުންކަން ފާހަގަކޮށް ޝުކުރު އަދާކުރެއްވިއެވެ. އަދި އަތޮޅު ކައުންސިލަށް މިއަހަރުވެސް ލޯކަލް ގަވރމަންޓް އޮތޯރިޓީގެ ކަންގަތި އެވޯޑު ދިނުމުގެ ރަސްމިއްޔާތުގައި ސެކިއުރިޓީ އިންޑެކްސް އިން މުޅިރާއްޖެއިން 1 ވަނަ އަދި އަތޮޅު ކައުންސިލުތަކުން 2 ވަނައަށް އެންމެ ރަގަޅު ކައުންސިލަކަށް ހޮވިފައިވާތީ، މިކާމިޔާބީ ލިބުމުގައި އަތޮޅު ހުރިހާ މުއައްސަސާތަކުން ލިބެމުންދާ އެއްބާރުލުން ފާހަގަކޮށް ޝުކުރު އަދާކޮށްފައި ވެއެވެ.