2024 އޮކްޓޫބަރު 24 އިން 25އަށް މި އަތޮޅު ކަނޑިތީމުގައި ބޭއްވުނު ށ.އަތޮޅުގެ ވާހަކަދެއްކުމުގެ މުބާރާތް ނިންމައި ވަނަވަނަ އަށް އައި ފަރާތްތަކަށް އެވޯޑާއި، ހަދާނީލިއުމާއި، ފައިސާގެ އިނާމު ޙަވާލުކޮށްދެއްވައިފިއެވެ.

އޮކްޓޫބަރު މަހުގެ 25ވަނަ ދުވަހުގެ ރޭ  8:30 ގައި ށ.އަތޮޅު މަދަރުސާގެ ހޯލުގައި ބޭއްވުނު މި ރަސްމިއްޔާތުގައި މުޅި މުބާރާތުން ވަނަތައް ޙާޞިލުކުރި ސްކޫލުތަކަށް ޓްރޮފީއާއި، ފައިސާގެ ވައުޗަރ ހަވާލުކޮށްދެއްވީ ރަސްމިއްޔާތުގެ ޝަރަފްވެރި މެހުމާން، ސިޓީތަކާއި، އިދާރީ ދާއިރާތައް ހިންގުމާއި، ޢާއްމު މަސައްކަތްތަކާ ބެހޭ ވުޒާރާގެ ވަޒީރު އަލްފާޟިލް އާދަމް ޝަރީފް ޢުމަރެވެ. މުޅި މުބާރާތުގެ ވަނަތަކަށް އައި ފަރާތްތަކަށް އިނާމާއި، ހަނދާނީ ލިއުން ށ.އަތޮޅުކައުންސިލުގެ ރައީސް އަލްފާޟިލް  މުޙައްމަދު ޝިޔާމު ޙަވާލުކޮށްދެއްވިއިރު، ދަށު ސާނަވީ، ސާނަވީ/މަތީ ސާނަވީ ގިންތިން ވަނަތައް ޙާޞިލުކުރި ދަރިވަރުންނަށް އިނާމާއި، ހަނދާނީލިއުން ޙަވާލުކޮށްދެއްވީ ސިޓީތަކާއި، އިދާރީ ދާއިރާތައް ހިންގުމާއި، ޢާއްމު މަސައްކަތްތަކާ ބެހޭ ވުޒާރާގެ ނާއިބު އަލްފާޟިލް މުޙައްމަދު ޢާރިފެވެ.

މި މުބާރާތުގެ ފަނޑިޔާރުންގެ ގޮތުގައި މަސައްކަތްކޮށްދެއްވާފައިވަނީ ހދ.ވައިކަރަދޫ ދަނބުގޭ މުޙައްމަދު ނަޞީރާއި ދ. ބަނޑިދޫ ޢަލީ އަމީރާއި، މ.ދިއްގަރު އެވަރލާސްޓް އިސްމާޢީލް ރަޒީން އިމްރާނެވެ.

ށ.އަތޮޅުކައުންސިލާއި، ކަނޑިތީމު ކައުންސިލާއި، އެރަށުގެ މުއައްސަސާތައް ގުޅިގެން ކަނޑިތީމުގައި ބޭއްވުނު މި މުބާރާތުގައި ގޮއިދޫ ،ފީވައް، ބިލެތްފަހީ، ފޯކައިދޫ، މަރޮށި، ޅައިމަގު، ފުނަދޫ ، މިލަންދޫ ސްކޫލާއި، ށ.އަތޮޅު މަދަރުސާ އާއި،ށ.އަތޮޅު ތަޢުލީމީ މަރުކަޒުން ޖުމުލަ 51 ދަރިވަރުން ވާދަކޮށް މުބާރާތުގެ ފަޚުރުވެރި އެއްވަނަ  ސްކޫލަކަށް ފުނަދޫ ސްކޫލު ހޮވިފައިވާއިރު ދެވަނަ ޙާޞިލުކޮށްފައިވަނީ ށ.އަތޮޅު ތަޢުލީމީ މަރުކަޒެވެ. އަދި ތިންވަނަ ޙާޞިލުކޮށްފައިވަނީ ޅައިމަގު ސްކޫލެވެ.  ދަށު ސާނަވީ ގޮފިން 1ވަނަ ށ.ފުނަދޫ ސްކޫލުގެ ދަރިވަރު ޢާއިޝަތު އީލާފް ޢަބްދުﷲ ޒާހިރު ހޯދާފައިވާއިރު، އެ ގޮފިން 2ވަނަ އެ ސްކޫލުގެ ދަރިވަރު މަރްޔަމް ނަދުހާ އާދަމް ޙާޞިލުކޮށްފައިވެއެވެ. އަދި 3ވަނަ ޙާޞިލުކޮށްފައިވަނީ ށ.ގޮއިދޫ ސްކޫލުގެ ދަރިވަރު ޢާއިޝަތު ރިޝާ ރަޝީދެވެ. ސާނަވީ/މަތީ ސާނަވީ ގިންތިން 1ވަނަ ށ.އަތޮޅު ތަޢުލީމީ މަރުކަޒުގެ ދަރިވަރު އާދަމް އިސްޙާޤު ހޯދާފައިވާއިރު ދެވަނަ މިލަންދޫ ސްކޫލުގެ ދަރިވަރު ޒަމްޢަތު ބިންތު ޢަލީ އަދި ފުނަދޫ ސްކޫލުގެ ދަރިވަރު ފާޠިމަތު ޔަޝްމީ ފާއިޒު ހޯދާފައިވެއެވެ. މި ގިންތީގެ 3ވަނަ ޙާޟިލުކޮށްފައިވަނީ ޅައިމަގު ސްކޫލުގެ ދަރިވަރު މުޙައްމަދު މަޢާން ޢަބްދުއްރަޝީދެވެ.  މި މުބާރާތުގެ ފަޚުރުވެރި 1ވަނަ ށ.އަތޮޅު ތަޢުލީމީ މަރުކަޒުގެ ދަރިވަރު އާދަމް އިސްޙާޤް ހޯދާފައިވާއިރު ދެވަނަ ށ.މިލަންދޫ ސްކޫލުގެ ދަރިވަރު ޒަމްޢަތު ބިންތު ޢަލީ އަދި ފުނަދޫ ސްކޫލުގެ ދަރިވަރު ފާޠިމަތު ޔަޝްމީ ފާއިޒް ޙާޞިލުކޮށްފައިވެއެވެ. އަދި ތިންވަނަ ޙާޞިލުކޮށްފައިވަނީ ޅައިމަގު ސްކޫލުގެ ދަރިވަރު މުޙައްމަދު މަޢާން ޢަބްދުއްރަޝީދާއި، ފުނަދޫ ސްކޫލުގެ ދަރިވަރު ޢާއިޝަތު އީލާފް ޢަބްދުﷲ ޒާހިރެވެ.

މި މުބާރާތް ބޭއްވުމުގެ މަޤްޞަދަކީ ވާހަކަދެއްކުންތެރިކަމުގެ ފަންނުގައި ކުޅަދާނަ ދަރީން އުފެއްދުމާއި، ތަފާތު މައިދާންތަކުގައި ދިވެހިބަހުން ފަސޭހަކަމާއެކު ވާހަކަދެއްކުމުގެ ހުނަރާއި ކުޅަދާނަކަން ހުރި ވާހަކަދެއްކުންތެރީން އުފެއްދުމެވެ. އަދި މި ފަންނުގައި ށ.އަތޮޅުގެ ދަރިންނަށް ކުރިޔަށްދިއުމުގެ މަގުތައް ތަނަވަސްކޮށްދީ، ފަހިކޮށްދިނުމާއި، ސްކޫލުތަކުގެ މެދުގައި އެކުވެރިކަން ބަދަހިކުރުމާއި، ދިވެހި ޤައުމިއްޔަތު ދިރުވައި އާލާކުރުން ކަމުގައި ށ.އަތޮޅުކައުންސިލް އިދާރާއިން މަޢުލޫމާތު ދެއްވައެވެ.