ށ.އަތޮޅުކައުންސިލުގެ މިއަހަރުގެ މަސައްކަތު ތާވަލުގައި ހިމެނިގެން ކުރިޔަށްގެންދެވޭ ށ. އަތޮޅު ހޭންޑްބޯލް މުބާރާތް ނޮވެންބަރު މަހުގެ 2ވަނަ ދުވަހު ފަށާގޮތަށް ކަނޑައަޅައިފިއެވެ.

      މިލަދުންމަޑުލު އުތުރުބުރީ އަތޮޅުކައުންސިލުގެ 4ވަނަ ދައުރުގެ 106ވަނަ ޢާއްމު ޖަލްސާއަށް އެޖެންޑާކޮށް 2024 އޯގަސްޓް 22ވަނަ ދުވަހު 10:00 ގައި ބޭއްވުނު މި ޖަލްސާގައި މަޝްވަރާކުރެވި މި ގޮތަށް ފާސްވެފައިވަނީ ޖަލްސާއަށް ޙާޟިރުވެވަޑައިގެންނެވި މެންބަރުންގެ އަޣުލަބިއްޔަތުންނެވެ.

      ށ.އަތޮޅުގެ އަންހެނުންނަށް ޚާއްޞަކޮށްގެން ބޭއްވޭ މި މުބާރާތަކީ ށ.އަތޮޅު ކައުންސިލުގެ 5 އަހަރު ދުވަހުގެ ތަރައްޤީގެ ޕްލޭންގައި ޒުވާނުން ބާރުވެރިކޮށް ވަޒީފާގެ ފުރުޞަތު ފަހިކުރުމާއި، ކުޅިވަރާއި، މުނިފޫހިފިލުވުމުގެ ދާއިރާ ކުރިއެރުވުމަށް ހިންގޭ ޕްރޮގްރާމުގެ ދަށުން ކޮންމެ ދެ އަހަރުން އެއް އަހަރު ބޭއްވުމަށް ކައުންސިލުން ފާސްކޮށްގެން ކުރިޔަށްގެންދާ ޕްރޮގްރާމެކެވެ.

ށ.އަތޮޅު ފުރަތަމަ ހޭންޑް ބޯލް މުބާރާތް ބާއްވާފައިވަނީ 2022 ވަނަ އަހަރު އެވެ. އެހަރު އަތޮޅުގެ 10 ރަށަކުން ވާދަކުރި އެ މުބާރާތުގެ ޗެމްޕިއަން ކަން ހޯދާފައިވާނީ ށ. ފޭދޫ ހޭންޑްބޯލް ޓީމެވެ.