ކުށްމަދުކުރުމާއި، ފުލުހުންގެ ވަޞީލަތްތައް ގާއިމުކުމަށް އަތޮޅުކައުންސިލުން ކުރިޔަށްގެންދާ ޕްރޮގްރާމުގެ ދަށުން ޑައިވިންގ އިކްއިޕްމަންޓްސް ށ.ފުނަދޫ ޕޮލިސް ސްޓޭޝަނާ ޙަވާލުކޮށްފިއެވެ.

2024 އޮގަސްޓު 13 ދުވަހުގެ 11:00 ގައި ށ.އަތޮޅު ކައުންސިލުގެ ޖަލްސާކުރާ މާލަމުގައި މިކަމަށްޓަކައި ބޭއްވުނު ބައްދަލުވުމުގައި ޕޮލިހުގެ ފަރާތުން ތަކެއްޗާ ޙަވާލުވެވަޑައިގެންނެވީ ރީޖަނަލް ކޮމާންޑަރ، ޗީފް ސްޕްރިންޑެންޓް އޮފް ޕޮލިސް އިބްރާހީމް ޒުހުރީއެވެ. އަދި ތަކެތި ޙަވާލުކޮށްދެއްވީ ށ.އަތޮޅުކައުންސިލުގެ ރައީސް މުޙައްމަދު ޝިޔާމުއެވެ.

ކުށްމަދުކުރުމަށާއި، ފުލުހުންގެ ވަޞީލަތްތައް ޤާއިމުކުރުމަށް  ކުރިޔަށްގެންދާ މި ޕްރޮގްރާމުގެ ދަށުން ރެސްކިއު އަދި އެހެނިހެން އޮޕަރޭޝަންތަކުގައި ތަކެތި ބޭނުންކުރުމަށް ހަމަޖެހިފައިވާއިރު، މޫދުގައި ހިނގާ ކުއްލި ޙާދިސާތަކުގައި ބޭނުންކުރުމުގެ އިތުރުން ޑައިވިންގ ތަމްރީނުތަކުގައި ބޭނުންކުރާގޮތަށް ހަމަޖެހިފައިވާކަމަށް މަޢުލޫމާތު ލިބިފައިވެއެވެ.

މި ބައްދަލުވުމުގައި މިއަހަރު ތެރޭގައި ޕޮލިހުންނާ ގުޅިގެން ހިންގުމަށް ހަމަޖެހިފައިވާ ޕްރޮގްރާމުތަކާ ގުޅޭގޮތުންނާއި، 2025ވަނަ އަހަރުގެ ށ.އަތޮޅު ކައުންސިލުގެ ބަޖެޓުގައި ޕޮލިހުންނާ ގުޅިގެން ކުރިޔަށްގެންދާނެ ޕްރޮގްރާމުތައް ހުށަހެޅުމާ ގުޅޭގޮތުންނާއި، އަތޮޅު ތެރޭގެ ރަށްރަށުގައި ކުށްކުރުން މަދުކުރުމާބެހޭ ޕްރޮގްރާމުތައް ހިންގުމުގައި ޕޮލިހުންގެ ފަރާތުން ދެއްވަމުންގެންދަވާ އެއްބާރުލުމާ އެއްގޮތަށް ކުރިޔަށް އޮތްތަނުގައި ވެސް ދެފަރާތުން ގުޅިގެން ޕްރޮގްރާމުތައް ހިންގުމާ ގުޅޭގޮތުން މަޝްވަރާކުރެވުނެވެ.

މި ރަސްމިއްޔާތުގައި ށ.އަތޮޅުކައުންސިލުގެ ރައީސް، މުޙައްމަދު ޝިޔާމާއި، ޕޮލިސް ރީޖަނަލް ކޮމާންޑަރ ޗީޕް ސްޕްރިންޑެންޓް އޮފް ޕޮލިސް އިބްރާހީމް ޒުހުރީގެ އިތުރުން އަތޮޅު ކޮމާންޑަރ، ޗީފް އިންސްޕެކްޓަރ އޮފް ޕޮލިސް މުހައްމަދު ޢަބްދުﷲގެ އިތުރުން ޗީފް އިންސްޕެކްޓަރ އޮފް ޕޮލިސް މުޙައްމަދު ސަކީލާއި، ފޯކައިދޫ ޕޮލިސް ސްޓޭޝަނާއި، ފުނަދޫ ޕޮލިސް ސްޓޭޝަނުގެ އިންޗާޖުންނާއި، ށ.އަތޮޅުކައުންސިލުގެ އެސް.އެމް.ޓީ ބޭފުޅުން ބައިވެވަޑައިގެންނެވިއެވެ.