ދިވެހިރާއްޖޭގެ ޤައުމީ ދުވަސް  އަތޮޅުފެންވަރުގައި ފާހަގަކުރާ ރަށެއްގެ ގޮތުގައި މާއުނގޫދޫ ކަނޑައަޅަފިއެވެ.  

ކައުންސިލުގެ މި އަހަރުގެ ބަޖެޓުގައި ހިމަނައި، އަދި މަސައްކަތު ތާވަލުގައި ހިމަނާފައިވާ މި ދުވަސް އަތޮޅުފެންވަރުގައި ފާހަގަކުރުމަށްޓަކައި މާއުނގޫދޫ ކަނޑައެޅިފައިވަނީ 2024 އޮގަސްޓު 8ވަނަ ދުވަހު ބޭއްވުނު މިލަދުންމަޑުލު އުތުރުބުރީ އަތޮޅުކައުންސިލުގެ 4ވަނަ ދައުރުގެ 104ވަނަ ޖަލްސާގައި ޖަލްސާއަށް ޙާޟިރުވި 13 މެންބަރުންގެ އިއްތިފާޤުންނެވެ. ކައުންސިލުން މި ގޮތަށް ނިންމާފައިވަނީ މި ކަމަށް މުޅި އަތޮޅަށް ހުޅުވާލެވުނު ފުރުޞަތުގައި ރަނގަޅު ޕްރޮޕޯސަލަކާއެކު ހަމައެކަނި މާއުނގޫދޫން ޝައުޤުވެރިކަން ފާޅުކުރުމުންނެވެ.

ޤައުމީ ދުވަސް އަތޮޅުފެންވަރުގައި ފާހަގަކުރުމަށްޓަކައި އެރަށުގައި ޤައުމީ ދިދަ ނެގުމުގެ ރަސްމިއްޔާތާއި، ދުވަހާގުޅޭ ރަސްމީ ޖަލްސާއާއި، ޖާފަތެއްގެ އިތުރުން އެދުވަސް ފާހަގަކުރުމަށް އެކިއެކި ކުޅިވަރާއި، މުނިފޫހިފިލުވުމުގެ އައިޓަމްތައް ރާވައިގެން ކުރިޔަށްގެންދާ ގޮތަށް ވަނީ ހަމަޖެހިފައެވެ. އަދި އެ ދުވަހަށް ރަށް ޒީނަތްތެރިކުރުމުގެ މަސައްކަތް މިހާރު ދަނީ ކުރެވެމުންނެވެ.

މި ދުވަހުގެ ޚާއްޞަ ރަސްމިއްޔާތުތައް ދައުލަތުގެ ވަޒީރުންގެ ފެންވަރުގައި ދައުވަތުދިނުމަށް ހަމަޖެހިފައިވާއިރު، އެލް.ޖީ.އޭގެ އިސްވެރިންނަށް ވެސް ދައުވަތުދިނުމަށް ހަމަޖެހިފައިވެއެވެ.

މި އަހަރުގެ ޤައުމީ ދުވަސް އަތޮޅުފެންވަރުގައި ފާހަގަކުރުމުގެ އިތުރުން ށ.އަތޮޅު ކައުންސިލުން މިދިޔަ އަހަރު މުޅިއަތޮޅަށް ހުޅުވާލައިގެން ބޭއްވުނު ފުޓްސަލް މުބާރާތް ހޯސްޓްކޮށްދިން ދެ ރަށުގެ ތެރޭގައި ވެސް މާއުނގޫދޫ ކައުންސިލް ހިމެނިފައިވާ ކަމުގައި ށ.އަތޮޅުކައުންސިލުން މަޢުލޫމާތުދެއްވައެވެ.