މިލަދުންމަޑުލު އުތުރުބުރީ އަތޮޅުކައުންސިލުން އިސްނަގައިގެން ށ. އަތޮޅު ރަށްރަށުގެ ސްކޫލުތަކުގެ ދަރިވަރުންނަށް އަމާޒުކޮށްގެން ބޭއްވުމަށް ހަމަޖެހިފައިވާ ވާހަކަ ދެއްކުމުގެ އަތޮޅު މުބާރާތުގައި ބައިވެރިވުމުގެ ފުރުޞަތު މިހާރުވަނީ ހުޅުވާލެވިފައެވެ.

މިއީ ސްކޫލްތަކުގެ ދަރިވަރުންގެ ހިތްތަކުގައި ދިވެހިބަހަށް ލޯބިޖައްސާ، ވާހަކަދެއްކުންތެރިކަމުގެ ފަންނުގައި ކުޅަދާނަ ދަރީންތަކެއް އުފެއްދުމާއި، ތަފާތު މައިދާންތަކުގައި ދިވެހިބަހުން ފަސޭހަކަމާއެކު ވާހަކަދެއްކުމުގެ ހުނަރާއި ކުޅަދާނަކަންހުރި ވާހަކަދެއްކުންތެރީން އުފެއްދުމާއި، މިފަންނުގައި ށ. އަތޮޅުގެ ދަރީންނަށް ކުރިއަށް ދިއުމުގެ މަގުތައް ތަނަވަސްކޮށްދީ، ފަހިކޮށްދިނުމާއި، ސްކޫލްތަކުގެ މެދުގައި އެކުވެރިކަން ބަދަހިކުރުމާއި، ޤައުމިއްޔަތު ދިރުވާ އާލާކުރުމުގެ މަޤްޞަދުގައި ބޭއްވުމަށް ހަމަޖެހިފައިވާ މުބާރާތެކެވެ.

މިމުބާރާތް ބޭއްވުމަށް ހަމަޖެހިފައިވަނީ ށ.އަތޮޅުގެ ސްކޫލްތަކުގައި ކިޔަވަމުންދާ ދަށު ސާނަވީ (ކީ ސްޓޭޖް 3) ސާނަވީ/މަތީ ސާނަވީ (ކީސްޓޭޖް 4،5) ގެ ދަރިވަރުންނަށް އަމާޒުކޮށްގެންނެވެ. މުބާރާތުގައި ބައިވެރިވާ ކޮންމެ ސްކޫލަކުން ބައިވެރި ކުރެވޭނީ މަދުވެގެން 3 ދަރިވަރުން، އަދި ގިނަވެގެން 5 ދަރިވަރުންގެ ޓީމަކަށެވެ.  ބައވެރިވުމުގެ ސުންގަޑިއަކީ މިހިނގާ އޮގަސްޓް މަހުގެ 15 ވަނަދުވަހުގެ އޮފީސް ބަންދުވުމުގެ ކުރިންނެވެ. ޓީމު ލިސްޓްތައް ފޮނުވަންޖެހޭނީ  ށ. އަތޮޅުކައުންސިލުގެ އިދާރާއަށެވެ.

މިއީ މިލަދުންމަޑުލު އުތުރުބުރީ އަތޮޅުކައުންސިލުން އިސްނަގައިގެން ބާއްވާ ފުރަތަމަ ވާހަކަދެއްކުމުގެ މުބާރާތެވެ.